انا مش عارف انت ليه مفروض تعيش فرحان !

بس كل اللى اعرفه انك لو وضعت نفسك فى حالة استرخاء وهدوء وسألت نفسك وكررت السؤال 21 مرة.... ليه مفروض أعيش فرحان ؟ هتلاقى انك اصبحت فرحان !
لأن الاسئلة اللى بتسألها لنفسك بتؤثر على الطريقة اللى بتحس بيها وكمان طريقة تصرفاتك وما ستكونه فى المستقبل مرة زمان لقيت نفسى زعلان ومش عارف ليه .... اقعدت اسأل نفسى انا ليه زعلان ..... زعلان انا ليه زعلان ....انا ليه زعلان .. يا واد يا هوبه 
لقيت عقلى عمال يجيبلى حاجات من سنين .... ومواقف كتير واسباب كتير ممكن تخلينى زعلان وحسيت ساعتها انى مش بس بقيت زعلان ده انا بقيت قرفان وزهقان ومخنوق وشوية وكنت هنتحر وأخلص من حياتى واريحكم منى 
فالعقل لازم يرد على اى سؤال انت بتسأله وبما ان كل واحد فينا عنده من التجارب والخبرات والمواقف الكتيرة جدا جدا واللى فيها حاجات تزعل كتيييير وحاجات تفرح كتيييييييييييير فالعقل هيديلك اجابة حسب سؤالك 
يعنى لو سألته انا ليه زعلان هيديلك اجابة ولو سألته انا ليه مفروض اعيش فرحان هيديلك اجابة ؟
علشان كده خد بالك من نوعية الاسئلة اللى بتسألها لنفسك ...
فى اسئلة ممكن تنقذك وفيه اسئلة ممكن تدمرك
يعنى لو انت طالب بدل ما تسأل نفسك لو سقطت هيحصل ايه ؟...... اسأل نفسك ازاى انجح بتفوق ؟
بدل ما تسأل لو الاسئلة صعبة هاعمل ايه ؟...... اسأل نفسك ازاى استعد للأسئلة الصعبة ؟

لو انت موظف بدل ما تسأل نفسك هأعمل ايه لو مديرى فصلنى ؟ اسأل ازاى أتجاوز توقعات مديرى باستمرار ؟
لو انتى زوجة بدل ما تسألى نفسك هأعمل أيه لو جوزى طلقنى ؟ اسألى نفسك ازاى احول البيت لجنة تخليه يستمتع بحياته معاى ؟
السؤال بيحول نقطة تركيزك وبالتالى بيحول مشاعرك واحاسيسك والطريقة اللى بتتصرف بيها وكمان بيغير مستقبلك 
اسأل السؤال الصح وعقلك هيقولك شبيك لبيك 
بس انا فى الأخر مش عارف 
ليه مفروض تعيش فرحان ؟
ليه مفروض تعيش فرحان ؟
ليه مفروض تعيش فرحان ؟

بقلم ايهاب ماجد

قالو عن المدرب

كيف اثر فيك ايهاب ماجد ؟

اثر فيا كتير انا مكنش عندي هدف ومكنتش عارفة اخطط لمستقبلي ولحياتي وبعد ما حضرتله عرفني ازاي يكون ليا هدف وازاي اخطط لكل خطوة قبل ما اعملها

ولاء محمد احدي المتدربات مع مدرب التغيير ايهاب ماجد

القوة بين إيديك

القوة بين ايديك

جربت مرة تكون عاوز تشترى حاجة ولما رحت المحل سألت علي الحاجة اللى انت عاوزها بس ملقتهاش ، سألت عليها فى محل تانى برضه ملقتهاش ، رحت ماشى وروحت اليبت من غير ما تشترى حاجة .

مرة تانية طقت فى دماغك تشترى حاجة تانية ولما نزلت تشتريها برضه ملقتهاش ، بس المرة دى قعدت تدور عليها وتلف وتلف وما روحتش بيتك إلا وهى معاك .

ايه الفرق مع انك انت نفس الشخص فى المرتين  ؟

خلينى أقولك فى المرة الاولى الحاجة دى  ممكن تكون مش ليك أو مش مهمة أوى بالنسبة لك فى الوقت ده ، أو شايف انها ممكن تتأجل لوقت تانى علشان عندك حاجة أهم  ، أو ربما مزاجك مش تمام ، وممكن تكون حاسس انها مش هتعمل فرق كبير فى حياتك ، أو تكون حاسس انها مش مسئوليتك انك تجيبها ، أو تكون عارف انك مش هتلاقيها لانك جربت مرة قبل كده وملقتهاش ، ممكن تكون حاسس انك هتتعب لو لفيت عليها وبرضه مش هتلاقيها ، أو أصلاً تكون بتتلكك ونفسك متلقهاش علشان تريح نفسك او حتى علشان توفر الفلوس او علشان تقول لنفسك وللى بعتك تشتريها بكل ثقة " مش قلتلك !.

المرة التانية الموضوع مختلف تماماَ ، لما الحاجة دى طقت فى دماغك بدأت تتخيلها وتشوف نفسك وهى معاك وانت مستمتع بيها ، وعرفت ان حياتك هتكون احسن لما تجيبها ، وحسيت انها هتشبع رغبة عندك ، وممكن تخليك مبسوط ، وكنت مصدق ده كله وده خلى رغبتك تزيد وخلى الحاجة بقت مهمة جدا وحسيت انك مش تقدر تعيش من غيرها ، كمان كنت واثق ومصدق جداً انها موجودة وانك هتلاقيها وكمان كنت مستعد تتعب علشان تجيبها ماكنتش بتفكر فى التعب اد ما بتفكر فى السعادة لما تجيبها وده كله خلى مزاجك تمام وفجر جواك قوة خليتك تدور بشكل مختلف وتفكر بشكل مختلف وتسأل بشكل مختلف وتتصرف بشكل مختلف القوة دى  كانت موجودة بين ايديك فى المرتين بس كانت مستنية حاجة تحركها  وتفجرها وتوجهها

ركز معاى واسمع بقى ، اللى حصل فى المرة التانية هى دى نفس الطريقة اللى ممكن توصل بيها لحلمك  سواء كان حلمك  تشترى قميص اوتشترى عربية ،سواء كان حلمك تكون موظف عادى او صاحب شركة ، طالب عادى أو عالم يغير الدنيا كلها ، وهى دى القوة اللى بين ايديك تقدر تستخدمها فى اى وقت انت عاوزه دلوقتى .

واشوفك المرة الجاية وحياتك لسه فيها أكتر و وراء كل بداية

جزمتك ........................... ؟!!!!!!!!!

جزمتك
 

 

من حوالى شهر كنت مع مراتى علشان كانت عاوزة تشترى جزمة ، وطبعاً انت لما هتتجوز هتكتشف حاجة غريبة جداً ، ان الراجل عنده جزمتين واحدة بنى وواحدة سودا بيلبس فيهم يمكن تلت اربع سنين وبعدين يفكر يشترى واحدة جديدة ، اما بالنسبة للستات عندها جزم ملهاش عدد وتقريباً كل ما تكون زهقانة تنزل تشترى واحدة ، المهم .. كنت انا ومراتى فى محل جزم ، وبعدين لقيت واحدة وبنتها وكانت قرفانة ومتضايقة جداً وبتقول لبنتها ... أيه ده ؟ معقولة بقالى أسبوع مش عارفة اشترى جزمة... بقالى اسبوع بدور على جزمة شيك مش لاقية !!!!
ساعتها طق فى نفوخى سؤال ساذج جداً وقلت ياترى الست دى بتدى نفس الوقت والطاقة والمجهود والفلوس لعقلها زى ما بتدي لجزمتها ؟؟!!!
فضلت شوية سرحان فى حالنا وفى حال الناس وساعتها قررت اكتب مقالة بعنوان " جزمتك "
غريبة احوالنا مع الجزم ، تلاقى الجزم محطوطة فى الفاترينة وكل يوم البياع يطلعها وينضفها ويرجعها تانى ، وفى نفس الوقت تلاقى العيش بيتباع على الرصيف ومرمى فى الارض عرضة للاتربة والميكروبات .مش غريبة دى !
أتعجب كيف نزن الأمور ؟ كيف نقيم الأمور ؟ تلاقى الواحد مننا كل يوم ينظف ويلمع ويصقل جزمته وينسى ينظف ويلمع ويصقل عقله !
فهل تهتم بعقلك يومياً كما تهتم بجزمتك يومياً ؟
هل اعطيت لعقلك من الوقت والمجهود والطاقة والاهتمام ما تعطيه لجزمتك ؟
تلاقى الواحد مننا مهتم قوى بالبدلة والقميص والبنطلون علشان شكله قدام الناس وينسى يهتم بصحته وقوة بنيته !
ماذا تقول لانسان كل اهتمامه بطلاء سيارته ، وتلميعها من الخارج تاركاً الموتور من الداخل خربان ؟
شفت ناس تفضل تفاصل مع بياع فى السوق علشان جنيه فى حين أنها ضيعت وقت يساوى اكتر بكتير من الجنيه اللى هى هتوفره ؟
شفت ناس بتتكلم وتفضل تتكلم وتغتاب وتفضل تغتاب وتضيع الوقت فى الكلام والجدال والنقد والشكوى واللوك لوك فى حين انها كانت ممكن توفر الطاقة دى وتعمل حاجة ايجابية تثبت فيها لغيرها ولنفسها انها مش بتاعة كلام بس ؟
كيف نزن الامور ؟ كيف نقيم الأمور ؟
فى الأخر
عاوز اقول
هل أعطيت لعقلك من الأهتمام ما تعطيه ل .........؟
مع تحياتى
مدرب التغيير
إيهاب ماجد
الباحث والكاتب فى التنمية البشرية